Home KERALA കുടുംബ വരുമാനമായ സാമൂഹികക്ഷേമ പെന്‍ഷനുകള്‍ ഉള്‍പ്പെടെ 3000 രൂപയും സംഭാവന നല്‍കി മാതൃകയായി ഗണേശനും...

കുടുംബ വരുമാനമായ സാമൂഹികക്ഷേമ പെന്‍ഷനുകള്‍ ഉള്‍പ്പെടെ 3000 രൂപയും സംഭാവന നല്‍കി മാതൃകയായി ഗണേശനും കുടുംബവും

തിരുവല്ല: സര്‍ക്കാരിന്റെ സാമൂഹികക്ഷേമ പെന്‍ഷനുകള്‍ ഉള്‍പ്പെടെ ആകെ മാസവരുമാനമായ 3000 രൂപയും മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കി മാതൃകയായി തിരുവല്ല പൊടിയാടി ലക്ഷ്മീഭവന്‍ വീട്ടില്‍ ഗണേശനും കുടുംബവും. മാനസിക വിഷമതകള്‍ അനുഭവിക്കുന്ന ഗണേശന് 1200 രൂപയാണ് സാമൂഹ്യ ക്ഷേമപെന്‍ഷനായി പ്രതിമാസം ലഭിക്കുന്നത്. ഇതിനൊപ്പം ഭിന്നശേഷിക്കാരിയായ മകള്‍ നീതു ഗണേശന് ലഭിച്ച പ്രതിമാസ പെന്‍ഷന്‍ 1200 രൂപയും, ഇവരെ പരിചരിക്കുന്ന ഗൃഹനാഥ ഗീത ഗണേശന്റെ കൈവശമുണ്ടായിരുന്ന 600 രൂപയും ചേര്‍ത്ത് കുടുംബത്തിന്റെ ആകെ മാസ വരുമാനമായ 3000 രൂപയും ഇവര്‍ സംഭാവന നല്‍കി. സര്‍ക്കാര്‍ രണ്ടു തവണകളായി ആറു മാസത്തെ പെന്‍ഷന്‍ നല്‍കിയപ്പോള്‍ കുടുംബമായി എടുത്ത തീരുമാനമാണ്, ഒരു മാസത്തെ മുഴുവന്‍ വരുമാനവും കോവിഡ് പ്രതിരോധ പ്രവര്‍ത്തനങ്ങള്‍ക്കായി മുഖ്യമന്ത്രിയുടെ ദുരിതാശ്വാസനിധിയിലേക്കു നല്‍കണമെന്നത്.
ഗീതാ ഗണേശില്‍ നിന്നും അഡ്വ. മാത്യു ടി തോമസ് എംഎല്‍എ തുക ഏറ്റുവാങ്ങി.
നിര്‍ധനാവസ്ഥയിലും സാമൂഹിക പ്രതിബദ്ധത പുലര്‍ത്തുന്ന ഗണേശന്റെ കുടുംബം നാടിന് മാതൃകയാണെന്ന് എംഎല്‍എ പറഞ്ഞു. ബ്ലോക്ക് പഞ്ചായത്ത് അംഗം ബിനില്‍ കുമാര്‍, നെടുമ്പ്രം ഗ്രാമ പഞ്ചായത്തംഗം ചന്ദ്രലേഖ എന്നിവര്‍ സന്നിഹിതരായിരുന്നു.

LEAVE A REPLY

Please enter your comment!
Please enter your name here